ماتستاهل ابجيلك حرامات ولا تاخذ بعد من عيني دمعه
جنت ازرع ورد بس هسه مجبور حتى الباقي منهن راح اشلعه
ايس مابقتلك يمي اسرار وحتى الي يدك باب الروح ادفعه
بقى يمي الشمع ذوبه الليل وانه متاني الصبح يطلع واشيعه
عرفتك ثوب بس ماتستر العيب المايرهم علي مجبور انزعه
جنت اخجل واعبرلك حجي هواي واعرف بيه جذب بس كلت اسمعه
وهسه اتكطعت وياك الدروب وبقى درب الخجل بلساني اطلعه
كرهتك كثر ماودعت الشموع شمعه بعيني تحله وتطفه شمعه
جنت كبر الجرح شايل معاناة وصدك جان الكلب من ينعه ينعه
جن داخل حسن لو طلعت الاخ وتطلع روحي اللك وتردهه فدعه
حسبتك رقم من لمعة البيك وين ادري صفر هم ينطي لمعه
وين ادري الغصن بيه يركض الموت وعلى عش المحنه يودي الافعه
باجر راح اجفن كل الجروح ونعش الذكريات براسي اشيعه
وباجر راح اهدم بيت الدموع وابني من الفرح بعيوني قلعه
وتذبل شفتك وترد الي زحوف وانه بجفي النهر وبجفي اكطعه
واكلك كل شي مات اللهفه والشوق محال الي يندفن تكدر ترجعه
وسود تصير كلها ايامك البيض وينذل خاطرك ويعض اصبعه
مثل ماجرحتني بكاسك الموت كاس الذل شرط باجر تجرعه