ومضات

ليش تكسر خاطري ؟چي مشتريك!!
وآنه لجلك روحي ماحاجيهه

گتلك امسح عيني غركت بالدموع
ماگلتلك حط اصبعك بيهه
......................
نقطه وحده ويستقر وضع العراق
وترد حنيّة گبل والطيبه

مجلس النِوّاب يطلع شلنه بيه؟
مظفّر النَوّاب كون نجيبه......
.................
شفتك وإنفتح باب الغزل بيك
رمش عينك نصل يكتل وميضه
إمتحان وكلشي حافظ حتّه الجلاد
شفت وجهك..أنطيت الورقه بيضه
................
لانته الصافيلك وياي اعله راي
ولانته التاركني ومخليني
أباب عيني سنين واگف..لاتفوت
ولاتخلي أحد يفوت بعيني
.................
من ذبح خنجرک نجماتی وضوای
بسمه عیونی اللیل چودرمن عصر
شتظن ينزفلك بعد قلمي وهواي
لاوحگ العلموک اعله الغدر
بعد شكتب عالصخر وحروفي ماي
والله ماتستاهل أكتبلك شطر
.................
أي نعم ذلّيت بس باجر تشوف
شلون أسكّت دمعي واضحك عالجرح
شهر شهرين النزف لازم يموت
الظلمه تكطع راسها خيوط الصبح
الكاع لوماتنتظر باجر حصاد
ولارضت بصدورهه تدوس الفلِح
..................

مشكور يالخنجرك خلّاني اكتب شعر
طعنات غدرك شته...
مشكور لله وإلك بجروحي خضّر برد..
لو ماعذاب الشمع چاماعرفنه الضوه
ولومامساحي الفلِح
بالگاع ماطگ ورد....

.........................
على الأم هواي عدنه دروس بكتاب القراءة
تحچي عنهه شلون من تحضن إبنها وتكبر بعينه الحياة
وحته لاتطفه الحياة......
الدوله لازم تلغي كل هاي الدروس
فشله عدنه أطفال ماعدهه أمهـــــات...

.........................
البارحه مطرت الدنيه وبچت غرفتنه علينه
وطاحن عيون وعلم......
وعدنه صوره لواحد من اخواني جندي
أذكر استشهد گبل مليون عام اعله العلم
المطر يغسل الصوره
وينزل احمر....
ينزل احمر..
ثاري مر بجرح أخوي وطلّع من الصوره دم....
.........................

عاصفة ارواح صعدت غطّت عيون الشمس
وبعد ماندري بلادي...
عيونه متيّه ضواهه
(الشمس أجمل في بلادي من سواها)
نادم السيّاب رد
ورجع عدّل بالقصيده
الموت أكثر في بلادي من سواها.....
...............................

چان عالفانوس حيدر يطلع يشوف اليتامه...
تنام كلهه ويبقى سهران الامير........
هسه طاقه...وخط حرج عدهه الحكومه
ومحد يشوف الفقير.....
...............
من يگول الوطن جنّه!!
غير بالتفجير امس حرگونه كلنه...
وكلشي ماطالت أدينه
عدنه بس طولة لسن...
شباقي عدنه فرهدوا كلشي الحكومه
الكهرباء والمنطقه الخضراء والوجه الحَسِن

ميثاق الهلالي